Dok traje suđenje između holivudske zvijezde Džonija Depa i njegove nekadašnje supruge Amber Herd, u javnost isplivavaju detalji njihovog odnosa ali i karaktera.

Foto: YouTube screenshot/The Tonight Show Starring Jimmy Fallon

U svijetlu najnovijih informacija o glumici, mnogi su počeli da sumnjaju u istinitost tvrdnji Amber Herd da je bila fizički i psihički zlostavljana od strane bivšeg supruga Džonija Depa. Najvjerniji fanovi zvijezde “Pirata sa Kariba” nikada to nisu ni dovodili u pitanje, a najnoviji sudski postupak ih je podstakao da pokrenu peticiju kako bi se Amber izbacila iz nastavka filma “Akvamen”.

Premijera ovog ostvarenja planira se za 2023. godinu, ali još uvijek nije sigurno da li će Depova bivša uspjeti da zadrži glavnu žensku ulogu.

Podsjetimo, karijera Džonija Depa krenula je silaznom putanjom nakon prvih optužbi za zlostavljanje, a osim što je glumac ostao bez uloge u čuvenom filmu “Fantastične zvijeri”, krajem prošle godine svi filmovi u kojima on glumi izbrisani su sa popularne striming platforme Netfliks u Americi i Australiji.

“Muškarci su žrtve porodičnog zlostavljanja, baš kao i žene. To se mora prepoznati i preduzeti mjere da se slavni nasilnik ne proslavi u industriji zabave”, navodi se u peticiji i dodaje:

“Učinite pravu stvar. Uklonite Amber Herd iz Akvamena 2”, dodaje se u peticiji koja je pokrenuta još 2019. godine, ali je ponovo aktuelna zbog suđenja.