Član Pokreta Evropa sad Ivan Lakić podnio je danas neopozivu ostavku u toj partiji.

Foto: PES

"Pokret Evropa Sad u koji sam ja ušao, poslednjih pola godine na moju veliku žalost poprimio je neke druge obrise, sada važe neka druga pravila, neki novi ljudi rješavaju najvažnije stvari, na visokim mjestima se zapošljavaju osobe iz bivšeg režima i ja više ne želim da budem dio te priče jer je ne doživljavam kao svoju. Ovim putem Vas obavještavam da podnosim neopozivu ostavku na funkciju člana Glavnog Odbora kao i na članstvo u Pokretu",  naveo je Lakić u obraćanju.

Kaže da je postojalo vrijeme kada su se mogli i sukobiti mišljenje na sjednicama GO, ali smatra da ni toga više nema.

"Jer se zbog elektronskih sjednica ne možemo ni vidjeti, ni čuti a ne razmijeniti mišljenje čime je svjesno suzbijeno kritičko mišljenje i sami dijalog što smatram da apsolutno nije dobro za demokratiju unutrar samog Pokreta, ali izgleda da je to određenim strukturama unutar Pokreta bio cilj",  naveo je on.

Mišljenja je, kaže, da jedna velika pozitivna energija koja ih je krasila - prosuta bespovratno.

"Na samom kraju želim da istaknem da sam veoma ponosan na stvari koje smo zajedno uradili u prethodnom periodu pogotovo pobjeda na predsjedničkim i parlamentarnim izborima 2023.godine koje smo zajedno izvojevali. Sada već bivšim kolegama želim puno uspjeha na svakom planu", poručio je Lakić.