Dan zaljubljenih je iza ćoška, pa tim povodom danas sa vama dijelimo recept za romantične kapkejkove koji su neodoljivi – kako izgledom, tako i ukusom!

Foto: IlustracijaPixabay.com 

Kombinacija jogurta, badema i vanile osigurava sočan i mekan biskvit, dok glazura od bijele čokolade ovim kapkejkovima donosi prefinjenu slatkoću. Stoga, ukoliko želite da voljenu osobu za praznik ljubavi obradujete malim i slatkim znakom pažnje, ovaj recept, koji prenosimo sa sajta Miss7, je kao stvoren za vas:

Romantični kapkejkovi za Dan zaljubljenih

Sastojci:

Za biskvit:

150 ml jogurta

3 jajeta

1 kašičica ekstrakta vanile

175 g šećera

140 g brašna

2 1/4 kašičice praška za pecivo

100 g mljevenog badema

175 g maslaca

Priprema:

Obložite kalup za mafine sa 12 udubljenja papirnim korpicama.

U dubljoj posudi pomiješajte jogurt, jaja i ekstrakt vanile.

Zatim dodajte suve sastojke i prstohvat soli, pa u sredini napravite udubljenje.

Ulijte mješavinu jogurta i otopljenog maslaca u udubljenje i brzo, ali nježno, umiješajte špatulom ili metalnom kašikom samo pazite da ne miješate predugo.

Smjesu rasporedite u papirne korpice – biće prilično pune.

Pecite 18-20 minuta dok ne postanu zlatni, narasli i elastični na dodir.

Ohladite ih nekoliko minuta u kalupu, zatim ih prebacite na rešetku da se potpuno ohlade.

Čuvajte u hermetički zatvorenoj posudi do 3 dana ili zamrznite što prije.

Za glazuru:

100 g bijele čokolade

140 g maslaca

140 g šećera u prahu

Priprema:

Istopite bijelu čokoladu u mikrotalasnoj rerni na visokoj temperaturi 1½ minut, miješajući na pola vremena, pa je ohladite.

U velikoj činiji mikserom umutite maslac i šećer u prahu, dok ne postanu kremasti.

Umiješajte ohlađenu čokoladu, pa pokrijte i čuvajte u frižideru do mjesec dana. Najkasnije 48 sati pre posluživanja (ili dan ranije ako je jako toplo) izvadite glazuru na sobnu temperaturu i premažite kapkejkove.

Ako želite, na kraju možete omotati vrpcu oko kapkejkova i pričvrstiti ih vezivanjem u mašnu, te posuti jestivim crvenim mrvicama ili srcima.

Čuvajte na hladnom mjestu, dalje od direktnog sunčevog svijetla. Uživajte u ukusnoj poslastici!