Reliant Regal Supervan III je mali kombi trotočkaš koji je britanska kompanija Reliant Motor proizvodila od 1962. do 1973. godine.

Foto: YouTube screenshot/Iconic Auctioneers

Iako ga mnogi pogrešno nazivaju Reliant Robin, vozilo koje su vozila braća Troter u seriji Mućke zapravo je model Regal Supervan III.

Njegova prepoznatljiva žuta boja i natpis "Trotters Independent Trading Co." učinili su ga jednim od najpoznatijih automobila u istoriji televizije.

Prvi Reliant Regal pojavio se 1953. godine kao nasljednik modela Regent. U ranim verzijama koristili su se aluminijum i drveni okvir, ali kako su cijene aluminijuma rasle, kompanija je prešla na stakloplastiku. 

Ova promjena donijela je značajnu prednost - vozilo je postalo lagano, ekonomično i otporno na rđu. 

Cijena i tržište

Tokom svog životnog vijeka, Reliant Regal Supervan III bio je vrlo povoljan i popularan među britanskim vozačima, naročito onima koji nisu imali vozačku dozvolu za automobile.

Njegova niska cijena i ekonomičnost činili su ga idealnim vozilom za one s ograničenim budžetom, a danas su preostali primjerci rijetki i vrlo traženi među kolekcionarima.

Jedan od originalnih primjeraka iz serije Mućke prodat je, tako, prošle godine za čak 29.250 funti.

Zanimljive činjenice o Reliant Regalu

Ekstremno lagan - Sa samo 445 kg jedan je od najlakših automobila ikad proizvedenih.

Nestabilnost u krivinama - Zbog tri točka i specifične konstrukcije bio je sklon prevrtanju, što je često prikazano u humorističnim scenama.

Više automobila korišćeno u seriji - Za snimanje Mućki korišćeno je najmanje šest primjeraka jer su se često kvarili ili oštećivali.

Čuvena registracija - Najpoznatiji model iz serije imao je registraciju "GPR 23N", koja je postala prepoznatljiv simbol serije.

Glumci nisu vojleli da ga voze - Dejvid Džejson (Del Boj) i Nikolas Lindhirst (Rodni) nisu voljeli da voze ovaj automobil jer je bio neugodan i klimav, pa su ga često gurali ili koristili alternativne metode snimanja.

Model Mk III iz 1956. bio je prvi potpuno izrađen od stakloplastike, dok je verzija Mk VII (poznata kao Regal 3/25) iz 1962. dobila poboljšanu karoseriju i novi čelični okvir. 

Kasniji model Regal 3/30 iz 1968. godine imao je 700 ccm motor snage 30 KS, čime je dodatno unaprijeđena njegova mobilnost, prenosi Index Auto.

Tehničke karakteristike:

Motor: 700 ccm OHV četvorocilindrični

Snaga: 29.5 KS

Mjenjač: manuelni, četvorostepeni

Masa: Oko 445 kg

Dimenzije: 3.429 mm x 1.486 mm x 1.448 mm

Najveća brzina: Oko 112 km/h.

Zahvaljujući svojoj maloj težini, vozilo je imalo dobru potrošnju goriva i niske troškove održavanja. Još jedna zanimljivost je da se zbog konfiguracije sa tri točka u Velikoj Britaniji mogao registrovati kao motocikl, što je značilo niže poreze i osiguranje.