Kako su plate i penzije crnogorskih građana rasle tokom mandata različitih Vlada?

Foto: ilustracija, Pixabay

Naime, ako se osvrnemo na period od 2012. do danas, razlike su i više nego uočljive.

Kako prenosi portal Biznis CG, tokom mandata Vlade Mila Đukanovića (2012–2016) minimalna zarada povećana je sa 146 na 193 eura, dok je minimalna penzija porasla sa 100,4 na 121 euro.

Prosječna plata u tom periodu povećana je sa 487 na 510 eura, dok je prosječna penzija zabilježila simboličan rast – sa 278 na 280 eura.

Tokom mandata Vlade Duška Markovića (2016–2020) nastavljen je postepen rast primanja.

Tako je minimalna zarada povećana je sa 193 na 222 eura, minimalna penzija sa 121 na 147 eura, dok je prosječna plata porasla sa 510 na 524 eura. Prosječna penzija povećana je sa 280 na 289 eura, što predstavlja jedno od najmanjih povećanja u posmatranom periodu.

Za vrijeme mandata Vlade Zdravka Krivokapića (2020–2022), minimalna zarada gotovo je udvostručena, sa 222 na 450 eura. 

To predstavlja najveći pojedinačni rast u posljednjih deset godina. Istovremeno, prosječna plata porasla je sa 524 na 706 eura, dok je minimalna penzija povećana sa 147 na 200 eura.

Prosječna penzija dostigla je 304 eura.

U periodu Vlade Dritana Abazovića (2022–2023) minimalna zarada ostala je na 450 eura, ali su značajno povećane penzije.

Minimalna penzija porasla je sa 200 na 296 eura, dok je prosječna penzija povećana sa 304 na 425 eura. Prosječna zarada nastavila je rast, sa 706 na 808 eura.

Novi rekordni porast zabilježen je od oktobra 2023. godine do danas, u mandatu Vlade Milojka Spajića.

Naime, minimalna zarada povećana je sa 450 na 600 eura (uz viši iznos od 800 eura za visoku stručnu spremu), minimalna penzija sa 296 na 456 eura, dok je prosječna plata dostigla 1.033 eura, u odnosu na oko 803 eura na početku mandata.

Prosječna penzija porasla je sa 425 na 561 euro, što predstavlja najveći nominalni iznos do sada.