Neočekivani saveznik. 

Foto: Ilustracija/Pixabay.com 

Lijepi i njegovani nokti san su mnogih žena. Ali, svakodnevni stres kojem su izloženi može ih učiniti suvim i lomljivim. Loša higijena, agresivna sredstva za čišćenje i nezdrava ishrana dodatno pridonose oštećenju noktiju. Ako želite imati snažne i zdrave nokte, rješenje se krije u maslinovom ulju.

Kako maslinovo ulje djeluje na nokte?

Maslinovo ulje nije samo neizostavan sastojak u kuhinji, već i moćan saveznik u njezi noktiju, kože i kose. Zahvaljujući visokom sadržaju vitamina E, podstiče rast noktiju, pruža im hidrataciju te pomaže u obnovi oštećenih i nadraženih zanoktica. Najbolje od svega – vjerovatno ga već imate u svojoj kuhinji.

Kako koristiti maslinovo ulje za njegu noktiju?

Korištenje maslinovog ulja izuzetno je jednostavno. Nekoliko kapi ulja umasirajte u nokte i zanoktice te ostavite da djeluje desetak minuta. Višak obrišite papirnim ubrusom. Ovaj postupak ponavljajte svakodnevno. Ako su vaši nokti posebno oslabljeni, možete ostaviti ulje da djeluje tokom noći.

Napravite vlastito ulje za nokte

Ako želite još intenzivniju njegu, možete napraviti vlastitu mješavinu ulja za nokte s maslinovim uljem. Trebaće vam jedna kašika ekstra djevičanskog maslinovog ulja, jedna kašika hladno prešanog bademovog ulja (prodire duboko u kožu oko noktiju) i pet kapi ulja čajevca (ima protuupalno i antibakterijsko djelovanje).

Sastojke pomiješajte u maloj staklenoj bočici s poklopcem i dobro protresite. Kako biste olakšali doziranje, ulje možete preliti u bočicu s kapaljkom. Čuvajte ga na tamnom i hladnom mjestu, kako bi što duže zadržalo svoja svojstva.

Kupka od maslinovog ulja za ruke i nokte

Još jedan način kako možete poboljšati zdravlje noktiju je kupka od maslinovog ulja. U zdjelu s toplom vodom dodajte kašiku maslinovog ulja, i uronite nokte na 10 do 15 minuta. Ova metoda pruža dubinsku hidrataciju i jača nokte. Najbolje ju je ponavljati jednom nedjeljno ili svake dvije nedjelje kako bi nokti ostali zdravi i čvrsti.

Vaše ruke i nokti zaslužuju njegu, a maslinovo ulje može biti jednostavan, prirodan i dobar način da im pružite potrebnu hidrataciju i zaštitu.