To je dio šire strategije uštede, efikasnosti i prilagođavanja modernim tehnologijama.

Foto: Ilustracija/ Pexels

Ako ste nedavno kupili ili iznajmili nov automobil i podigli poklopac prtljažnika tražeći rezervni točak - moguće je da ste ostali zbunjeni. Niste jedini.

Sve veći broj novih automobila više ne dolazi sa rezervnim točkom, a razlog za to nije slučajnost, već pažljivo promišljena odluka proizvođača.

Evo glavnih razloga zbog kojih su rezervni točkovi postali prošlost:

Ušteda u proizvodnji

Automobilska industrija mjeri svaki gram, svaki cent i svaki detalj. Izbacivanjem rezervnog točka, gume i dizalice, proizvođači smanjuju troškove proizvodnje.

Iako se radi o "maloj" stavci, u industriji koja broji milione automobila godišnje - ova ušteda postaje značajna.

Naravno, ako baš želite rezervni točak, mnogi brendovi će vam ga rado prodati - kao dodatnu opremu.

Manja težina znači manja potrošnja

Bez rezervnog točka automobil je lakši za oko 27 kilograma. Možda se to ne čini kao velika razlika, ali u svijetu automobilske regulative svaki gram CO2 je važan.

Lakši automobil troši manje goriva, što pomaže proizvođačima da prođu stroge EU standarde emisije štetnih gasova i izbjegnu dodatne takse.

Električni i hibridni automobili: prostor je dragocjen

Kod hibrida i električnih vozila, prostor u donjem dijelu vozila je često rezervisan za bateriju. To znači da fizički nema mjesta za rezervni točak.

Osim toga, u ovim vozilima je i teža kontrola mase još važnija, jer svaki dodatni kilogram direktno utiče na potrošnju energije i domet.

Šta dobijate umjesto točka?

Većina vozila bez rezervnog točka dolazi sa tzv. kompletom za hitnu sanaciju gume - brtvilom i malim kompresorom za vazduh. Ovi setovi mogu pomoći kod manjih bušenja, ali ako je guma jače oštećena ili isječena - pomoći neće.

Zato je važno da redovno provjeravate stanje svojih guma i znate kada je vrijeme da ih zamjenite. A ako krećete na duži put - razmislite o kupovini dodatnog rezervnog točka, piše HAK Revija.