Koncept same akcije je bolji ove godine, jer imate konkretne proizvode koje su definisani, ali ono što, po mom mišljenju, nije dobro, jeste da ovakve akcije ne daju dugoročne rezultate, kazao je ekonomski analitičar Mirza Mulešković.

Foto: Ilustracija, Pixabay

Mulešković kaže da su ovakve akcije dobre u jednom dijelu, ali da bi se borilo sa inflacijom treba više da se radi na održivosti privrede.

Očekuje da će stopa inflacije opadati iz mjeseca u mjesec.

“Moramo da imamo set mjera, moramo da imamo dobro programirane mjere. Šta ćemo nakon ove akcije, jer ne možete cijele godine da imate akcije, ne možete cijele godine da imate popuste na određene proizvode, već morate da imate kvalitetan set mjera koji će da podrži privredu, da dugoročno radimo na stabilizaciji cijena, jer teško da može doći do smenjenja cijena ove godine”, kazao je Mulešković u “Dobro jutro Crna Goro” na TVCG.

Domet i akcije su, kako je naglasio, veoma ograničene i domet i akcije će trajati dok traje ta akcija, dva mjeseca kako je propisano, do kraja maja.

“Već na kraju maja vi ćete imati povratak cijena ovih 43 proizvoda na staro, ili će čak određene cijene da budu veće”, kazao je Mulešković.

Naglasio je da je dobro da je počelo makar nešto da se radi po pitanju borbe protiv inflacije, jer osim te dvije akcije, stop inflacije 1 i 2, nismo imali ništa u prethodne dvije godine.

“Prije nove godine smo čuli da će biti mjere koje se odnose na borbu protiv inflacije, nismo ih vidjeli u budžetu i bilo je jasno da nećemo imati određene konkretne mjere, ali ovakve mjere su dobre u jednom dijelu, jer jednoj grupaciji građana mogu da pomognu da kupuje određene proizvode po nižim cijenama”, kazao je Mulešković.

Vlada je, kaže, donijela odluku koja je restriktivna i koja ograničava marže.

Prethodne dvije akcije su, prema riječima Muleškovića, bile dobrovoljne i trgovci su mogli da uključe bilo koje proizvode. Iako je bilo ovako jedan dio komponente ograničavanja marže i prošle godine, tako da ima određenih sličnosti.

“Ono što možemo reći da prethodna jeste možda bolja iz ugla dobrovoljnosti, imali smo mnogo više proizvoda i sami se možemo sjetiti da su trgovci uključivali mnogo više proizvoda, ali moram da priznam da se i ta akcija bila pretvorila u određenu katalošku akciju”, istakao je Mulešković.